ஞாயிறு மதிய நேரம்

ஞாயிறு மதிய நேரம்

மைதானம் காலி

யாருமே இல்லை

இல்லாதவர்கள் யாருக்கும் தெரியாது

அவர்கள் மைதானத்தில் இல்லாதது

மைதானத்தில் யாரும் இல்லாததும்

மைதானத்துக்கு மட்டுமே தெரியும் -

யாரும் இல்லாததும்

வெறுமையும் பற்றி

போகும் பேருந்தில்

ஜன்னலோர இருக்கையில் நான்

காலியான மைதானம் பார்த்தவாறே

மைதானத்தில் இல்லாத எல்லோரையும் பார்த்தவாறே

பேருந்து போய்க்கொண்டே இருக்கிறது

யாருக்குமே தெரியாது

நான் இருப்பது பற்றி -

மைதானம், இல்லாத எல்லோரும், இருக்கும் மரங்கள்

எதற்கும் எவருக்கும் தெரியாது

போய்க்கொண்டிருக்கும் பேருந்தின்

ஜன்னலோர இருக்கையில் இருந்தவாறே

ஏதும் இல்லாமையை உணரும்

ஒரு பார்வையாளன் பற்றியும்