உணர்நிலை

தாண்டவம்

2011-07-31T09:02:00.003+05:30

இருள் நிரப்பும் ஜன்னலின் அருகே
பொருளற்ற நிலைப்பயனாய் அவன் கட்டில்
வெள்ளி ஒளி நிரப்பும் நிலாவுடன்
சற்றுத் தொலைவில் சில பிறவாக் கனவுகள்

நிலாவில் ஒரு காலும் அவன் விலாவில்
ஒரு காலுமாய்
ஆனந்த சக்தியின் தாண்டவம்
இன்றிரவும் நேற்றைப் போலவே

ஒளி

2010-09-16T20:36:00.000+05:30

நிலாவின் நிழல் படர்ந்ததில்
பறி போனதோ பாதி சூரியன்

பாதி சூரியன் பறி போனதில்
பார்வைக்குப் பிறந்து வந்தது இலை
மீதொளிர்ந்த தெரு விளக்கொளி

ஒளி போனதில் வந்த ஒளியும்
ஒளி போல் அழகாகவே...

சாராதிருத்தல்

2010-09-15T17:39:00.002+05:30

மழையும் மேகமும் தனித்தனியாயிருப்பினும்
ஒன்றுக்கொன்று சாராதனவல்ல
காற்றும் இலைகளும் தனித்தனியாயினும்
காற்று விளை அசைவிலேயே இலைகள் பொருள் கொள்கின்றன
அகமும் புறமும் தனித்தனியேயாயினும்
ஒன்றுக்கொன்று சாராதிருப்பதில்லை
தெரிந்ததும், தெரிந்தே தெரியாதனவும் தனியாயிருப்பினும்
இரண்டும் இணைந்தே பொருள் பெறுகின்றன
சாராதிருத்தல் பற்றிப் பேசும்போதெல்லாம்
சார்ந்திருத்தலை முழுதாய் அறிந்தே இருக்கிறோம்
இருப்பினும் அத்தனை எண்ண ஓட்டம் மொத்தமும்
ஒன்றுக்கொன்று சாராதிருப்பதாகவே படுகிறது

நாசமாப்போன நாலு வரி

2010-09-11T23:26:00.001+05:30

எதாவது எழுதிப்புடணும்ன்னு தேடித் தேடிப் பாத்து முடிச்சா
பாடுபொருள் பஞ்சம் மட்டும் தான் மிச்சம் நிக்கிது
பாட்டு ஒண்ணும் புதுசாப் பொறந்துடல்லே
காணாத கனவும், நீண்டு நெளிஞ்ச நெழலுமாயும், இல்லாத இருப்பையும் பத்தி எழுதி எழுதி
பேனா மொனை தேஞ்சது தான் மிச்சம்

கட்டுக் கட்டாய் கறுப்பு மசி படிஞ்ச காயிதக் கட்டு
குளிர் காய எரிக்க மட்டுமே பிரயோசனம்
புதுசா எதாவது எழுதிப்புடணும்ன்னு நெனச்சு பேப்பரும் பேனாவுமாய் உக்காரும்போதெல்லாம் வந்து பொறந்திடும்
ஒரே மாதிரி, அதே மாதிரி, சுமாரான,
நாசமாப்போன நாலு வரி.

ரகசியங்கள்

2009-08-08T18:04:00.004+05:30

நீர்ப்பரப்பின் மிக மெல்லிய சலனங்கள்
திடீரென பொருள் கொள்கின்றன.
செல்லும் மென்காற்றின் நெய்த புத்தம் புது கனவுகள்
நமக்காக விட்டுச்சென்ற குறிப்புகளும்
உணர ஏங்கிய ரகசியங்களுமாய்.
நமைச்சுற்றி நிரப்பும் நிலவொளி.
வெள்ளி நீர்ப்பரப்பில் நமதான ரகசியங்களின்
காலடியோசைகளின் எதிரொலியில் -
நம் காதுகளின் உள்ளே புது ரகசியங்களின்
ரீங்காரம்!

பூனைகள்

2009-02-21T13:48:00.009+05:30

பொதுவாகவே எனக்கு எப்போதுமே பூனைகளை பிடித்ததில்லை
நான் படித்துப்பார்க்கும் எல்லோருக்கும்
நகுலனுக்கும் சுந்தர ராமசாமிக்கும் போதலேருக்கும்
முராகாமிக்கும் பாரதியாருக்கும்
எல்லோருக்கும் பூனைகளைப் பிடித்திருக்கிறது
எனக்கோ அவ்வளவாக பூனைகளைப் பிடிப்பதில்லை
இத்தனையும் படிக்கையிலே எனக்கும் பூனைகளை பிடித்துப்
போய் விடவேண்டும் போலவே இருக்கிறது
ஆயினும் என்னால் எனக்கு
பூனைகளை பிடிக்க வைக்கமுடியவில்லை

சாம்பல் நிற சிறு மேகம்

2008-10-28T12:16:00.003+05:30

இந்த தீபாவளி இரவில்
இருள் வானின் உயரே சென்று
வெடித்து வெளிச்ச சிதறல்கள் பரப்புகின்றன
வாண வேடிக்கைகள்
இறுதியில் மீந்து இருப்பது
வானில் ஒரு சிறிய சாம்பல் நிற
காளான் வடிவொத்த ஒரு
சிறு மேகம் மட்டுமே
எப்போதும் எனக்கு
வாண வேடிக்கைகளை விட
அந்த சாம்பல் வண்ண சிறு மேகங்கள்
ரொம்பவும் அழகாகவே தோன்றுகின்றன...

எனது

2008-09-30T20:33:00.001+05:30

இத்தனை நாட்களாய் தணியாத குழப்பம்

எனது எது, எனதல்லது எது

நில்லாது தேடித் திரிகிறேன்

எனது எதுவென்று புரிவதற்குள்

அது எனதல்லதாகி விடுகிறது

நான் எனதானவனா?

என் வாழ்க்கை எனதானதா?

நான் வாழ்ந்து கழித்திருக்கும் இத்தனை நாட்களும்

எனதானவையா?

இத்தனை குழப்பங்களும் இப்படியே இருக்க,

எனது முடிவு மட்டும் எனதாயிருக்குமோ?

அதன் பின்னே எனக்கு அது

புரிந்ததாய் இருக்குமோ?

இத்தனை காலம் வாழ்ந்து முடித்தும்

தணியவே தணியாத இந்தக் குழப்பம்...

நீச்சல்

2008-09-06T11:01:00.003+05:30

சற்றுத் தொலைவில் தெரியும் கரை
நீச்சலுக்கு உறு துணையாய் அலைகள்
ஒளியால் கை காட்டி திசை உணர்த்தும்
கலங்கரை விளக்கம்
மனமெல்லாம் மகிழ்வு
வானெல்லாம் விண்மீன்கள்
வேறென்ன வேண்டும் கரை சேருதற்கு?
இத்தனை இருக்க
கரை சேருதல் அன்றி
வேறொரு வழியும் உண்டோ?

தத்தோம் தீம் தோம்

2008-09-05T13:37:00.004+05:30

தத்தோம் தீம் தோம்
தரிகிட தோம்

நர்த்தன ஈசனின் தாளக்கட்டும்
தூரத்து இடியும்
நாட்டிய ஜதியும்
எதிரொலியாய் என் குளியலறைக்குள்
அடித்து துணி துவைக்கையிலே
காதாற நான் கேட்டேன்

தத்தோம் தீம் தோம்
தரிகிட தோம்

ஒற்றைக் கொம்பு காண்டாமிருகம்

2008-09-05T13:06:00.002+05:30

சாத்தானின் இரட்டைக் கொம்புகளில்
சத்தமின்றி சந்தம் பயின்று

ஆய்த எழுத்தில்
தலை கீழாய் கருத்தொருமித்த
ஏராளக் கணங்களில்

உயர் மெய், உயிர் மெய்யில்
நினைவு நிறுத்தி
துணை எழுத்தாய் மெய் எழுத்து தேடி

அங்கும் இங்கும் பார்த்து நிற்கையிலே
மாறுகிறேன் நான்

ஒரு
ஒற்றைக்கொம்பு
காண்டாமிருகமாய்...

புத்தகங்கள்

2008-08-25T09:02:00.003+05:30

சென்னையில் வந்து தங்கி இருப்பதுவும் கையில் ஆயிரம் ரூபாய்க்கு பரிசாய்க் கிடைத்த புத்தகக் காசோலை இருந்ததாலும் கிட்டத்தட்ட இருபது புத்தகங்கள் வாங்க முடிந்தது.
ஆஹா வேறென்ன வேண்டும் - விடுமுறை + வேண்டிய அளவு புத்தகங்கள் = விரும்பிய வண்ணம் வாழ்வு!

நிலை

2008-08-18T22:46:00.004+05:30

இருள் தாண்டி தேடிப் பார்க்கையிலே
எதுவுமே தெரியலியே
இருட்டுக்குழாயின் எதிர்முனையிலே
இருக்குதொரு ரத்தினச்சுடருன்னு
சொன்னதெல்லாம் நெசமில்லையோ
நம்பிக்கையில் நியாயமில்லையோ?

உத்து உத்து பாக்கையிலே
எல்லாம் தெரிஞ்சிது
அடடா இது தானே வேணுமின்னு
இத்தனை நாளா ஏங்கித் தவங்கிடந்தேன்
இன்னிக்கு என் முன்னே இது வந்து நிக்கயிலே
இல்லேன்னு எப்படி நெனைக்கப் போனேன்?

நல்ல வேளை இப்பவே
கண் முழிச்சேன்
நாளைக்குன்னா நடந்தே முடிஞ்சிருக்கும்
நெனைக்காத எல்லாமும்!

யாருமற்ற ஞாயிறு

2008-08-16T11:52:00.002+05:30

யாருமற்ற ஞாயிறு
எனதல்ல என்றிருக்கையில்
மனதில் பொதிந்த மெட்டுக்களின்
எதிரொலி விளை பலனாய்
எனதே எனதான
மற்றொரு புது நாள்

நிழல்

2008-08-14T07:32:00.001+05:30

நான் நீண்டு நிலம் சாய

என் நிழல் நிமிர்ந்து

நிஜமாய் மாறி

ஒரு குழப்பக் கணத்தில்

நிஜம் கண்டோம்

நானும் நிழலும்!

மின்னல்

2008-08-13T15:07:00.002+05:30

(1)
வாயிற்படியில்,
இல்லாத அழைப்பு மணியில்
விரல்கள் பதித்து அழுத்தியவாறே
நிறைந்து நின்றிருந்த மின்னல் ஒன்று
எனது வருகைக்குக் காத்து நின்று
நான் வந்த பின் சென்று மறைந்த மாயம்
யாரும் சொல்லிப் புரியவில்லை
யாரிடம் கேட்டும் தெரியவில்லை
(2)
இங்குள்ளோர் எல்லாரும் எல்லாமும் தெரிந்த நிலை ஒன்றைத்
தமக்காக்கிக் கொண்டமையால்
எல்லாருக்கும் எல்லாமும் தெரிந்ததாய் ஒரு மாயை
ஊடுருவியே கிடக்கிறது
நடுவே வந்து அவர்கள் காணாத மின்னலும்
அவர்கள் அறிவுக்கு மிக அற்பமே
பேசுவதற்கும் கேலி சிரிப்பதற்கும் இன்றைக்கு
இந்த மின்னல் போதுமே

நிறுத்தம்

2008-08-13T14:00:00.005+05:30

துளித்துளியாய்ப் பரவி, திரவ நிலை தாண்டி
அங்கிருந்து அப்படியே ஆவியாய் நிறைந்து
பொடிப்பொடியாய் துகள்துகளாய்
தனித்த நிலை நீங்கி
தான் மறந்த நிலை தேடி
இங்கிருந்து அங்கும் அங்கிருந்து இங்குமாய்
பறந்து திரியும் பற்பல நிலைகளின் நடுவில்
சற்றே நின்று இறகு மடித்து இளைப்பாற
இங்கே ஒரு நிறுத்தம்